Stolið málverk fannst í rútu

141 árs gamalt málverk sem stolið var af listasafni í Marseille í desember 2009 fannst um borð í rútu í París fyrr í þessum mánuði.

Verkið, sem er eftir franska listamanninn Edgar Degas og heitir Les Choristes, fannst við reglubundið fíkniefnaeftirlit tollvarða í ferðatösku í farangursrými rútu skammt fyrir utan París þann 16. febrúar síðastliðinn.

Enginn farþeganna viðurkenndi að eiga töskuna og hefur enginn verið handtekinn í tengslum við málið. Málverkaránið var aldrei upplýst heldur, en þótti afar dularfullt.

Engin ummerki um innbrot fundust en forsvarsmenn Musée d‘Orsay safnsins í París, sem á verkið, hafa lokið við að greina verkið sem fannst og staðfest að um upprunalegu myndina sé að ræða. Safnið hafði lánað myndina til listasafns í Marseille þar sem því var stolið.