Voru mest 127 sætum á eftir Englandi á FIFA-listanum en nú munar bara 2 sætum

Englendingar duttu út fyrir Íslendingum á síðasta stórmóti og nú eru þeir í hættu á að fara að missa íslenska landsliðið upp fyrir sig á FIFA-listanum.

Íslenska fótboltalandsliðið er í átjánda sæti á nýjasta styrkleikalista Alþjóðaknattspyrnusambandsins en FIFA-listinn fyrir febrúar var gefinn út í dag.

Íslensku strákarnir hækka sig um tvö sæti frá síðasta lista og settu með þessu nýtt met því íslenska landsliðið hefur aldrei verið ofar á FIFA-listanum.

Íslenska landsliðið er nú aðeins tveimur sætum á eftir enska landsliðinu sem er í 16. sæti.

NEW #FIFARANKING

Germany stay top

Iceland reach record high

More info  https://t.co/ap5dvgBeW9pic.twitter.com/kQHHTSWHN6

— FIFA.com (@FIFAcom) February 15, 2018

Það er örugglega enginn búinn að gleyma 2-1 sigri Íslands á Englandi í sextán liða úrslitum Evrópumótsins í Frakklandi 2016. Þá var íslenska liðið 23 sætum á eftir enska liðinu á FIFA-listanum.

Íslensku strákarnir hafa haldið áfram að hækka sig á listanum frá þessu magnaða kvöldi í Nice í lok júní 2016 en á sama tíma hefur enska landsliðið dottið niður um nokkur sæti. Íslenska liðið minnkaði muninn um tvö sæti á þessum nýjasta lista.

Nokkrum árum fyrir leikinn í Nice var munurinn á liðinu ótrúlegur miðað við það hvað hann er í dag.

Á FIFA-listanum sem var gefinn út í ágúst 2012 þá var íslenska landsliðið heilum 127 sætum á eftir því enska. Lars Lagerbäck var þá nýtekinn við og íslenska landsliðið hafði tapað fyrstu fjórum leikjum sínumm undir stjórn Svíans.

England var þá í 3. sæti listans á sama tíma og íslenska landsliðið var í 130. sæti. Lars Lagerbäck tókst með hjálp Heimis Hallgrímssonar að búa til frábært landslið og á þessum tæpu sex árum hefur íslenska landsliðið unnið upp 125 sæti á enska landsliðið á FIFA-listanum.

Mesti munur á Íslandi og Englandi á FIFA-listanum

127 sæti - ágúst 2012 (England 3. sæti, Ísland 130. sæti)

125 sæti - júlí 2012 (England 4. sæti, Ísland 129. sæti)

125 sæti - júní 2012 (England 6. sæti, Ísland 131. sæti)

124 sæti - maí 2012 (England 7. sæti, Ísland 131. sæti)

124 sæti - apríl 2012 (England 7. sæti, Ísland 131. sæti)

120 sæti - ágúst 2011 (England 4. sæti, Ísland 124. sæti)

Minnsti munur á Íslandi og Englandi á FIFA-listanum

2 sæti - febrúar 2018 (England 16. sæti, Ísland 18. sæti)

4 sæti - janúar 2018 (England 16. sæti, Ísland 20. sæti)

6 sæti - júlí 2017 (England 13. sæti, Ísland 19. sæti)

7 sæti - desember 2017 (England 15. sæti, Ísland 22. sæti)

7 sæti - nóvember 2017 (England 15. sæti, Ísland 22. sæti)

7 sæti - september 2017 (England 15. sæti, Ísland 22. sæti)

7 sæti - ágúst 2017 (England 13. sæti, Ísland 20. sæti)

7 sæti - maí 2017 (England 14. sæti, Ísland 21. sæti)

7 sæti - apríl 2017 (England 14. sæti, Ísland 21. sæti)

7 sæti - febrúar 2017 (England 13. sæti, Ísland 20. sæti)