Grínaðist með heimilsofbeldi en fær ekki kæru | Sambandið vissi af tístunum

Enska knattspyrnusambandið gaf það út í gærkvöldi að Phil Neville, sem það réð sem landsliðsþjálfara kvenna í fyrradag, verður ekki ákærður fyrir gömul tíst af Twitter sem voru dregin upp sama dag og hann var ráðinn.

Ráðning Neville var nógu umdeild áður en tístin voru grafin upp þar sem þessi fyrrverandi Englandsmeistari með Manchester United hefur aldrei áður starfað sem aðalþjálfari og var ráðinn sem landsliðsþjálfari án þess að sækja um þegar að hæfara fólk beið í röðum eftir því að fá starfið.

Ekki hjálpaði svo til að tíst eins og þetta frá 2011: „Kominn aftur, vel slakur - var að berja konuna og líður miklu betur núna,“ var grafið upp sama dag og hann var ráðinn.

Samtökin Kick it Out sendu bréf á enska knattspyrnusambandið í gær þar sem þau kröfðust aðgerða en forsvarsmenn sambandsins svöruðu í gærkvöldi og sögðust ekkert ætla að aðhafast í málinu. Neville mun aðeins fá fræðslu um það hvernig skal haga sér sem starfsmaður enska sambandsins.

Þetta aðgerðarleysi kemur ekki á óvart sé tekið mið af grein sem birtist á The Guardian í gærkvöldi en þar er fullyrt að fólkið sem réði Neville til starfa sem landsliðsþjálfara kvennaliðsins vissi af því að hann var að grínast með heimilisofbeldi og fleira í þeim dúr á Twitter á sínum tíma.

Gagnrýnin í garð enska sambandsins er svakaleg þessa dagana enda var forveri Neville, Mark Sampson, látinn fara vegna eineltis og kynþáttaníðs í garð leikmanns liðsins. Ekki var tekið á því fyrr en sein og um síðir.

Phil Neville baðst afsökunar á tístunum í gær, sagði þau ekki vera í takt við sinn karakter.