Segja Mahrez ekki á óskalista Liverpool

Enski miðillin SkySports segir ekkert til í sögusögnum um að Liverpool sé að leggja fram tilboð í Riyad Mahrez, leikmann Leicester, til að leysa Philippe Coutinho af hólmi.

Fljótlega eftir að Liverpool staðfesti samkomulag við Barcelona um kaupverðið á Coutinho, næst dýrasta knattspyrnumanni heims, fóru fjölmiðlar að orða leikmenn við Liverpool.

Arabíski fréttamiðillinn beIN Sports sagði forráðamenn Liverpool hafa haft samband við Leicester og að væri verið að leggja lokahönd á tilboð upp á 50 milljónir punda.

Það virðist hinsvegar ekki vera satt ef marka má heimildir SkySports en Liverpool hefur einnig verið orðað við franska landsliðsmanninn Thomas Lemar sem leikur með Mónakó í heimalandi sínu.