Maður slasaðist alvarlega af völdum hraunspýju á Havaí

Fyrsta alvarlega slysið á fólki vegna eldgossins á Havaí átti sér stað í gær þegar karlmaður sem sat á svölum heima hjá sér fékk hraunspýju.

Talskona sveitarstjóra á svæðinu segir að spýjur úr rennandi hrauni geti vegið jafnmikið og ísskápur. Spýjan hafi lent á sköflungi mannsins þar sem hann sat á svölum á þriðju hæð og „rústað öllu þarna niðri á fætinum á honum“, að því er segir í frétt Reuters.

Breska ríkisútvarpið BBC segir að hraunflæðið frá Kilauea-eldfjallinu á Stóru eyju Havaí hafi aukist á sumum stöðum um hvítasunnuhelgina. Jarðfræðingar vara við því að hraunið sé óútreiknanlegt og hvetja íbúa á svæðinu til þess að fylgja fyrirmælum yfirvalda.

Strandvegur sem er helsta undankomuleið íbúa á hamfarasvæðinu lokaðist næstum því í gær. Þá er talið mögulegt að hraunið nái út í sjó sem skapar hættu á að eiturgufa myndist og berist um.

Þúsundir manna hafa þegar yfirgefið heimili sín á sumum svæðum eyjunnar og kjarreldar hafa kviknað sums staðar vegna hraunsins.