United áhugasamt um Nainggolan

Manchester United hefur áhuga á Radja Nainggolan, miðjumanni Roma, og er tilbúið að bjóða allt að 40 milljónir í hann samkvæmt Gazzetta dello Sport.

José Mourinho, knattspyrnustjóri United, virðist vera í leit að miðjumanni og breskir fjölmiðlar hafa greint frá því að hann hafi áhuga á að endurnýja kynnin við Nemanja Matic, miðjumann Chelsea.

Nainggolan hefur verið í herbúðum Roma frá því í janúar 2014. Belginn á þrjú ár eftir af samningi sínum við ítalska félagið.

Nainggolan er 29 ára gamall og samkvæmt Gazetta dello Sport er Roma tilbúið að selja hann áður en hann rýrnar í verði.

Nainggolan skoraði 11 mörk í 36 leikjum fyrir Roma í ítölsku úrvalsdeildinni á síðasta tímabili. Hann hefur alls leikið 160 leiki fyrir Roma og skorað 28 mörk.