Abe tilkynninir hvenær Akihito muni stíga af keisarastóli

Akihito Japanskeistari mun afsala sér völdum þann 30. apríl 2019. Frá þessu greindi Shinzo Abe, forsætisráðherra Japans, í morgun.

Hinn 57 ára krónprins landsins, Naruhito, mun taka við krúnunni daginn eftir, eða 1. maí 2019. Þetta er í fyrsta sinn sem Japanskeistari afsalar sér krúnunni í nærri tvö hundruð ár.

„Ríkisstjórnin hyggst gera allt sem í sínu valdi stendur til að tryggja að japanska þjóðin geti fagnað valdaskiptunum,“ segir Abe.

Hinn 83 ára Akihito nýtur mikillar lýðhylli í Japan. Hann óskaði eftir því að afsala sér völdum á síðasta ári og vísaði þar til aldurs og veikinda sinna. Keisarinn hefur glímt við blöðruhálskrabbamein og gengist undir hjartaaðgerð.

Japanska þingið staðfesti í sumar lög sem gerir keisaranum kleift að afsala sér völdum. Kváðu lögin á um að keisarinn yrði að afsala sér völdum innan þriggja ára og að þau ættu ekki við um framtíðarkeisara.

Japan er eitt elsta konungsríki heims, en einungis karlmenn geta gegnt keisaraembættinu í landinu.