Skipstjóri Costa Concordia gaf sig fram

Francesco Schettino, skipstjóri skemmtiferðaskipsins Costa Concordia, gaf sig fram við yfirvöld í dag eftir að hæstiréttur Ítalíu staðfesti 16 ára fangelsisdóm yfir honum. Hann var við stjórn skipsins þegar það sigldi á sker og hvolfdi í Miðjarðarhafinu árið 2012, en 32 létu lífið.

Hann var upprunalega dæmdur fyrir manndráp, að valda sjóslysi og að yfirgefa skipið áður en allir aðrir voru komnir frá borði, árið 2015 og hefur áfrýjunarferli staðið yfir síðan þá.

Schettino var gefið gælunafnið „Captain Coward“, eða „heigull skipstjóri“ af fjölmiðlum í Ítalíu eftir slysið og eftir að landhelgisgæslan birti hljóðupptöku þar sem hann var í björgunarbát og þvertók fyrir að fara aftur um borð í skipið.

Samkvæmt frétt BBC voru rúmlega fjögur þúsund manns um borð þegar skipið hvolfdi og ríkti mikil ringulreið þegar skipið var yfirgefið.

Saksóknarar héldu því fram að Schettino hefði siglt of nálægt eyjunni til að monta sig fyrir dansara sem var með honum í brúnni þegar skipið strandaði og hvolfdi. Schettino sjálfur kenndi þó samskiptaörðugleikum við stýrimann sinn um slysið, en sá var frá Indónesíu.

Fimm aðrir samstarfsmenn Schettino voru einnig dæmdir í fangelsi vegna slyssins.