Dómur yfir „Kundby-stúlkunni“ þyngdur í átta ár

Eystri landsréttur í Danmörku þyngdi í dag dóm yfir sautján ára stúlku sem hún hafði fengið fyrir hryðjuverkabrot. Dómurinn var þyngdur um tvö ár, úr sex í átta ára fangelsi. DR greinir frá.

Stúlkan hafði ætlað sér að gera sprengjuárásir í tveimur skólum á Kaupmannahafnarsvæðinu árið 2015 þegar hún var aðeins fimmtán ára að aldri.

Skólanir sem um ræðir voru annars vegar Sydskolen í Fårevejle, þar sem hún stundaði sjálf nám, og svo Carolineskolen í Kaupmannahöfn sem ætlaður er gyðingum.

Stúlkan var handtekin í bænum Kundby á Sjálandi, um áttatíu kílómetrum vestur af Kaupmannahöfn, í janúar á síðasta ári. Þar fundust leiðbeiningar um sprengjugerð og önnur gögn þar sem orðið „jihad“ kom ítrekað fyrir. Þá hafði hún verið í sambandi við liðsmenn hryðjuverkasamtakanna ISIS á samfélagsmiðlum.

Málið hefur vakið mikla athygli í Danmörku á síðustu mánuðum. Hún er fyrsta danska konan sem sakfelld er fyrir hryðjuverkabrot.