Meirihluti kjósenda óánægður með Macron

Meirihluti franskra kjósenda er óánægður með störf Emmanuel Macrons. Þetta sýna niðurstöður skoðanakönnunar franska markaðsfyrirtækisins Ifop sem birtist í dagblaðinu Le Journal du Dimanche.

Skoðanakönnunin þykir marka straumhvörf fyrir Macron sem vann yfirburðasigur í forsetakjörinu á vormánuðum en hann hlaut 66% atkvæða.

Í skoðanakönnuninni mældust 57% kjósenda óánægðir með forsetann en það er jafnframt fjórtán prósentustigum meira en í síðustu könnun sem var framkvæmd í júlí. 40% kjósenda voru ánægðir með forsetann en það hefur einnig minnkað um sömu fjórtán prósent síðan í júlí.

Álitsgjafar telja að franskir kjósendur séu óánægðir með endurbætur á vinnumarkaðslöggjöfinni, deilur við herinn og niðurskurð á framlögum til húsnæðismála að því er fram kemur í frétt Reuters.

Sama skoðanakönnun sýnir einnig fram á vaxandi óánægju með forsætisráðherra landsins, Edouard Philippe, en 47% kjósenda voru ánægðir með hann sem er níu prósentustigum minna en í júlí, þegar síðast var mælt.