Kínverjar banna Bangsímon

Kína Ekki er lengur hægt að skrifa um eða deila myndum af hinum viðkunnanlega bangsa Bangsímon, sé maður á inter­netinu í Kína. BBC greindi frá þessu. Ástæðan er sögð sú að Kínverjar hafi deilt myndum af Bangsímon í sambærilegum aðstæðum og forseti landsins, Xi Jinping, og líkt forsetanum við barnabókabangsann vinsæla. Segir í umfjöllun BBC að Kínverjar líði ekki að hæðst sé að leiðtoganum. Því megi ekki líkja forsetanum við barnabókapersónu. „Hér er forsetinn herra Grár. Hann er ekki með neinn kjánaskap. Hann gerir aldrei mistök og er yfir almenning hafinn. Það má ekki gagnrýna hann,“ skrifar Stephen McDonnell, blaðamaður BBC í Peking, höfuðborg Kína. – þea