Mikil sprenging við mosku í Kabúl

Lögregla í Afganistan segir frá því að maður hafi sprengt sjálfan sig í loft upp við mosku sjíamúslima í höfuðborginni Kabúl. Ljóst er að einhverjir hafa særst í árásinni, þó að enn hafi ekki fengist upplýsingar um fjölda.

Í frétt Al Jazeera segir að árásin var gerð í tengslum við föstudagsbæn og er haft eftir sjónarvottum að þeir hafi heyrt skothljóð í kjölfar sprengingarinnar.

Talsmaður innanríkisráðuneytis landsins hefur greint afgönskum fjölmiðlum frá því að tveir eða þrír menn hafi átt aðild að árásinni, auk sjálfsvígssprengjumannsins.

Þegar mennirnir voru búnir með skotfæri sín hafi þeir beitt hnífum til að ráðast á bænagesti.