Kroos segir Scholes betri en Lampard og Gerrard

Toni Kroos, leikmaður Spánar- og Evrópumeistara Real Madrid og þýska landsliðsins, segir að Paul Scholes hafi verið betri leikmaður en Frank Lampard og Steven Gerrard.

Kroos var spurður að því á Twitter hver þeirra þriggja væri bestur. Að mati Þjóðverjans er það Scholes sem lék allan sinn feril með Manchester United, félagi sem Kroos hefur oft verið orðaður við.

Paul Scholes https://t.co/U301mtgHsQ

— Toni Kroos (@ToniKroos) December 11, 2017

Samanburðurinn á Scholes, Lampard og Gerrard hefur verið eitt vinsælasta umræðuefnið í enska boltanum í mörg ár og sitt sýnist hverjum.

Kroos og félagar hans í Real Madrid eru núna staddir í Sameinuðu arabísku furstadæmunum þar sem þeir freista þess að verja heimsmeistaratitil félagsliða.

Real Madrid mætir Al-Jazira í undanúrslitum í Abú Dabí síðdegis.