Vantrauststillaga gæti leitt til nýrra kosninga á Írlandi

Ríkisstjórn Írlands stendur nú höllum fæti eftir að stjórnarandstöðuflokkurinn Fianna Fáil lagði fram tillögu um vantraust á hendur aðstoðarforsætisráðherra landsins, Frances Fitzgerald.

Ástæðan tillögunnar snýr að aðkomu Fitzgerald að máli uppljóstrara innan lögreglunnar á þeim tíma sem hún gegndi embætti dómsmálaráðherra.

Vantrauststillagan verður til umræðu á írska þinginu næstkomandi þriðjudag og er mögulegt að málið kunni að leiða til nýrra kosninga og tefji þar með viðræður breskra stjórnvalda við ESB um útgöngu Bretlands úr sambandinu. Eitt af þeim málum sem þarf að leysa við Brexit er hvernig haga skuli málum á landamærum Írlands og Norður-Írlands þegar Bretland gengur úr ESB í lok mars 2019.

Samkomulag Fianna Fáil og Sinn Gael

Írski utanríkisráðherrann Simon Coveney hefur harðlega gagnrýnt tillögu Fianna Fáil og segir hana stofna hagsmunum írsku þjóðarinnar í hættu.

Forsætisráðherrann Leo Varadkar og flokkur hans, Finn Gael, leiða nú minnihlutastjórn, en Finn Gael og Fianna Fáil náðu á sínum tíma samkomulagi um að Fianna Fáil verji stjórnina falli. Með vantrauststillögunni má segja að samkomulag flokkanna sé ekki lengur í gildi.

Brást ekki við

Deilt er um aðkomu Fitzgerald að máli lögreglumanns sem ljóstraði upp um brot innan lögreglunnar. Fitzgerald, sem þá gegndi embætti dómsmálaráðherra, á að hafa verið kunnugt um tilraunir manna til að ófrægja uppljóstrarann, án þess þó að bregðast við.

Fianna Fáil hefur gefið í skyn að vantrauststillagan verði dregin til baka, ákveði Fitzgerald að segja af sér. Micheál Martin, formaður Fianna Fáil, segir að hægt verði að komast hjá nýjum kosningum, ákveði Fitzgerald að stíga til hliðar.