Fimm létust í bílslysi í Leeds

Fimm létust í bílslysi í Leeds í Englandi þegar stolinni bifreið var ekið á tré í gærkvöldi.

Þrír þeirra látnu voru á barnsaldri, tólf ára drengur og tveir fimmtán ára drengir. Hinir mennirnir voru 24 og 28 ára gamlir.

Tveir fimmtán ára drengir eru í haldi lögreglu eftir atvikið og hafa lögregluyfirvöld ekki viljað tjá sig um aðkomu þeirra að málinu, en talið er að þeir hafi verið farþegar í bílnum.

Lögreglan rannsakar nú hvort allir þeirra látnu hafi verið farþegar í bílnum eða hvort einhverjir þeirra hafi verið gangandi vegfarendur.

Lögreglan vinnur nú að því að rannsaka tildrög slyssins og hefur götunni þar sem slysið átti sér stað verið lokað.