Ekki heppilegur rjúpnaveiðidagur í fyrsta stormi vetrarins

Allt bendir til þess að dagurinn í dag verði ekki heppilegur rjúpnaveiðidagur, að sögn upplýsingafulltrúa Landsbjargar. Spáð er suðaustanstormi á landinu í dag og hefur Veðurstofan hvatt rjúpnaveiðifólk sérstaklega til að fylgjast vel með veðurspám.

Hvassast á að vera við suðvesturströndina í dag og á norðanverðu Snæfellsnesi og á hálendinu síðdegis þegar kröpp lægð gengur yfir landið. Búist er við mjög hvössum vindstrengjum við fjöll víða um land og snjókomu á fjallvegum sem getur truflað samgöngur.

„Það er náttúrulega rjúpnaveiðitímabil núna og mönnum hættir til að vera í kapphlaupi við tímann. Það bendir allt til þess að dagurinn í dag sé ekki heppilegur rjúpnaveiðidagur,“ segir Davíð Már Bjarnason, upplýsingafulltrúi Slysavarnafélagsins Landsbjargar.

Hann brýnir fyrir rjúpnaskyttum að huga að veðurspá og fylgjast með aðstæðum.

„Ef menn fara út annars staðar á landinu þar sem þeim þykir það henta er mikilvægt að vera vel útbúinn, huga að öryggisbúnaði, vera með GPS-tæki og hleðslukubb fyrir símann,“ segir hann.

Ekki sérstakur viðbúnaður björgunarsveita

Appelsínugul viðvörun er í gildi fyrir höfuðborgarsvæðið, Suðurland, Faxaflóa, Breiðafjörð og Miðhálendið samkvæmt nýju viðvörunarkerfi Veðurstofu Íslands. Þá er gul veðurviðvörun í gildi fyrir Vestfirði, Strandir, Norðurland vestra og eystra, Austurland að Glettingi, Austfirði og Suðausturland.

Í athugasemd veðurfræðings á vef Veðurstofunnar kemur fram að veðrið muni skella hratt á, fyrst suðvestantil upp úr hádegi með snjókomu, en síðar slyddu eða rigningu.

Í nótt eigi að ganga í suðaustanstorm norðaustanlands en lægja síðan með morgninum. Í fyrramálið er spáð hríðaveðri á Austfjörðum með talsverðri snjókomu eða slyddu um tíma, en síðan rigningu. Þar á að lægja og rofa til um og eftir hádegi.

Björgunarsveitarmenn eru sem fyrr til taks ef útköll berast en Davíð Már segir að ekki sé sérstakur viðbúnaður fyrir þennan fyrsta storm vetrarins.

Í þéttbýlinu á höfuðborgarsvæðinu segir Davíð Már það sama gilda um að huga að lausamunum og í fyrri hvassviðrum.

„Það eru bara gömlu góður klisjurnar um trampólínin og lausa hluti í görðunum sem gilda hér,“ segir hann.