„Auðvitað getum við sem samfélag gert betur“

Skólastjóri grunnskólans á Húsavík segir skólann hafa náð árangri í eineltismálum á undanförnum árum en móðir fyrrverandi nemanda við skólann hefur gagnrýnt skólayfirvöld og samfélagið á Húsavík fyrir að hafa brugðist í málefnum dóttur sinnar. Sveitarstjórinn segir að samfélagið verði að gera betur.

Í kvöldfréttum Stöðvar 2 og á Vísi í gær var sagt frá foreldrum og dóttur þeirra á Húsavík en dóttirin segðist hafa orðið fyrir grófu einelti og útskúfun í samfélaginu á síðustu árum. Eins og fram kom í fréttum í gær reyndi stúlkan að svipta sig lífi í síðustu viku. 

„Það kemur svona bara sjúkraflutningamennirnir tveir og tveir lögreglumenn og læknir og þeir mynda svona fallegan hring í kringum hana. Hún sat hérna í þessum stól og þeir töluðu við hana og hughreistu hana og spurðu af hverju hún var ða gera þetta. Lögreglumaðurinn sem kom hérna hann hefur áður lent í því að finna hana í fjalli þegar hún var búin að skrifa okkur bréf í eitt skiptið. Maður hugsar bara hvað næst?“ segir Sigrún Birna Árnadóttir, móðir stúlkunnar.

Segir að árangur hafi náðst í baráttu gegn einelti

Í kjölfarið af þessu atviki sagði Sigrún sögu dóttur sinnar á Facebook en í kjölfarið af því hafa þær báðar orðið fyrir aðkasti en foreldrarnir saka grunnskólann sem dóttir þeirra stundaði nám við og samfélagið hafa brugðist í málefnum dóttur þeirra.Skólastjóri Borgarhólsskóla sendi út yfirlýsingu vegna málsins og var hún birt a heimasíðu grunnskólans. 

Hann getur ekki tjáð sig um einstaka mál eða nemendur en sagði skólann vinna eftir ákveðinni stefnu, komi eineltismál upp.

„Alltaf þegar það koma upp eineltismál og tilkynningar þá er allt mjög vel skráð og haldnar ítarlegar fundargerðir um öll skref sem eru tekin, við hverja er talað og hvað er gert,“ segir Þórgunnur Reykjalín Vigfúsdóttir, skólastjóri Borgarhólsskóla

Árið 2013 hóf skólinn að taka þátt í árlegri skimun og segir Þórgunnur að árangur hafi náðst í baráttunni gegn einelti. Hún segir starfsfólk skólans vinna að heilundum að vellíðan nemenda.Verkferlar vegna eineltismála eru í sífelldri endurskoðun. 

Telur þú að skólinn hafi í einhverjum tilvikum brugðist í máli þessa neanda?

„Ég bara get ekki tjáð mig um mál einstakra nemenda.“

Sveitarstjóri Norðurþings segir áríðandi að allir íbúar í litlu samfélagi finni að þeir tilheyri samfélaginu. Þegar erfið mál komi upp þarf samfélagið að standa saman.

„Þegar að fólk á um sárt að binda þá skiptir auðvitað máli að við mætum því af kærleika og skilningssemi og verum skilningsrík í garð allra með það en auðvitað getum við sem samfélag gert betur á mörgum vígstöðum,“ segir Kristján Þór Magnússon, sveitarstjóri Norðurþings.