Segir algjört grín að velja þrjá samherja Kára í landsliðið

Kris Boyd, fyrrverandi framherji Rangers og skoska landsliðsins í fótbolta, segir landsliðshópinn sem valinn var á dögunum aðhlátursefni, sérstaklega þar sem þrír samherjar Kára Árnasonar í Aberdeen voru valdir.

Þremenningarnir heita Graeme Shinnie, 26 ára varnar- og miðjumaður sem hefur aldrei verið valinn áður, Kenny McLean, 25 ára miðjumaður sem á einn landsleik að baki, og Ryan Christie, 22 ára miðjumaður á láni frá Celtic sem er einnig nýliði.

Um vináttuleik gegn Hollandi er að ræða en hann fer fram á Pittodrie-vellinum í Aberdeen og vill Kris Boyd meina að þessir þrír séu valdir í þeim eina tilgangi að fylla völlinn í von um að stuðningsmenn Aberdeen komi að sjá sína menn.

Boyd er sérstaklega á móti valinu á Graeme Shinnie sem spilar bæði sem vinstri bakvörður og miðjumaður. Hann segir þennan 26 ára gamla leikmann og samherja íslenska landsliðsmannsins Kára Árnasonar eiga sér enga framtíð með skoska landsliðinu.

„Þetta er bara ekki nógu gott. Hann er ekki að fara að spila sem vinstri bakvörður því ekki einu sinni Barry Douglas, sem spilar alla leiki með Wolves sem er toppliðið í Championship, kemst ekki í hópinn,“ segir Boyd í viðtali við BBC í Skotlandi en Daily Mail greinir frá.

„Hann spilar ekki einu sinni vinstri bakvörð hjá Aberdeen og tveir bestu leikmenn Skotlands eru vinstri bakverðir; Kieran Tierney og Andrew Robertson.“

„Ef við horfum svo á miðjumennina þá sá ég Celtic-þríeykið Scott Brown, Stuart Armstrong and Callum McGregor hlaupa yfir þá í leik Celtic og Aberdeen á dögunum,“ segir Boyd.

Boyd gagnrýnir landsliðsþjálfarann Malky Makay, sem áður þjálfaði Aron Einar Gunnarsson hjá Cardiff, harkalega fyrir þetta val og vill meina að það hefði veirð öðruvísi færi leikurinn fram annars staðar.

„Að hafa þessa þrjá menn í hópnum snýst meira um miðasölu en nokkuð annað. Ef leikurinn færi fram í Hibernian væru fleiri leikmenn þaðan. Þetta snýst bara um að skoska sambandið er að reyna að róa niður stuðningsmennina sem þoldu ekki Gordon Strachan. Þetta er orðið alveg eins og þegar Berti Vogts var með liðið. Þá fengu leikmenn landsleiki fyrir að gera ekki neitt,“ segir Kris Boyd.