Íslenska liðið endaði með tíu menn í jafntefli í Albaníu

Strákarnir í 21 árs landsliðinu náðu ekki að koma fram hefndum frá því í fyrri leiknum á Íslandi en fara heim með eitt stig eftir markalaust jafntefli á móti Albaníu í kvöld í undankeppni EM 2019.

Albanía vann fyrri leikinn 3-2 á Íslandi í byrjun september en íslenska liðið hefur tekið vörnina í gegn og haldið hreinu í tveimur síðustu leikjum sínum.

Strákarnir unnu 2-0 útisigur á toppliði Slóvakíu fyrir fimm dögum en Albert Guðmundsson skoraði þá bæði mörkin í leiknum.

Íslenska liðið endaði manni færri í leiknum í kvöld.

Ásgeir Sigurgeirsson kom inná sem varamaður á 82. mínútu en náði þó ekki að enda leikinn því hann fékk beint rautt spjald á 90. mínútu.

Albanarnir voru sókndjarfari í kvöld og áttu ellefu skot að marki á móti sex skotum frá íslenska liðinu.

Íslenska liðið er áfram stigi á eftir Albaníu í fjórða sæti riðilsins eftir þennan leik í kvöld.