Finnska lögreglan segir árásina hafa beinst sérstaklega að konum

Lögreglan í Finnlandi segir að árásarmaðurinn hafi, að því er virðist, reynt að stinga sem flestar konur. Heimildir breska ríkisútvarpsins BBC herma að sex af þeim átta sem slösuðust í árásinni hafi verið konur. Athygli er þó vakin á því að þetta eru ekki staðfestar upplýsingar frá lögreglu.

Árásarmaðurinn gekk inn á markaðstorgið Puutori í suðvesturhluta borgarinnar Turku í Finnlandi um fjögurleytið að staðartíma í gær. Hann réðst á fólk, vopnaður hnífi, með þeim afleiðingum að tveir létust. Árásarmaðurinn er af marokkóskum uppruna og er innflytjandi í Finnlandi. Hann náðist skömmu eftir árásina og var skotinn í fótinn af lögreglu.

Tveir finnskir ríkisborgarar létust í árásinni og á meðal þeirra særðu er Breti, Ítali og tveir Svíar.

Í nótt voru fimm, til viðbótar, handteknir í aðgerðum lögreglunnar grunaðir um aðild að ódæðinu. Hlutverk þeirra sem handteknir voru í nótt er nú til rannsóknar en lögregluyfirvöld hafa gefið út að þeir hafi verið í samskiptum við árásarmanninn.