Björn varð starfsmanni dýragarðs að bana í Svíþjóð

Nítján ára starfsmaður dýragarðs í Orsa í sænsku Dölunum lést á sjúkrahúsi í dag eftir að hafa orðið fyrir árás bjarnardýrs fyrr um daginn.

Árásin átti sér stað skömmu fyrir klukkan 10:30 að staðartíma, um 8:30 að íslenskum tíma.

„Eitthvað hefur farið úrskeiðis þegar starfsmaðurinn fór inn í búrið og birninum hefur á einhvern hátt tekist að komast þar inn. Þetta var ungur skógarbjörn sem var síðar aflífaður,“ segir Anders Blomquist, starfandi forstjóri félags sem rekur Orsa Rovdjurspark.

Í frétt SVT kemur fram að árásin hafi átt sér stað þegar viðburður í skipulagðri dagskrá garðsins fór þar fram. Var starfsmaðurinn að fylgja fjölskyldu inn í sérstakt búr þar sem verið var að undirbúa að gefa dýrunum þegar tveggja ára björn réðst á hann. Fjölskyldan meiddist ekki. Virðist sem birninum hafi tekist að grafa sér leið inn í búrið.

Búið er að loka dýragarðinum í dag vegna slyssins.