Morðin í Gautaborg: Faðirinn grunaður um morð á konu sinni og þremur börnum

Dómstóll í Svíþjóð hefur dæmt 51 árs gamlan karlmann í gæsluvarðhald vegna gruns um að hafa orðið eiginkonu sinni og þremur börnum að bana í Angered fyrir utan Gautaborg á fimmtudag.

Fólkið fannst eftir að tilkynnt var um eld í íbúðinni. Þar fundust konan og eitt barnanna látin. Hin börnin tvö létust í sjúkrabíl á leiðinni á sjúkrahús og á sjúkrahúsi.

Áverkar fundust á líkum fólksins sem varð til þess að lögreglu grunaði að þau hafi ekki látist í brunanum. Karlmaðurinn, sem er bosnískur ríkisborgari, neitar sök í málinu.

Aftonbladet segir frá því að sama dag og fólkið fannst látið hafi átt að vísa fjölskyldunni úr íbúðinni. Hafi hún verið stórskuldug og ekki greitt leigu af íbúðinni í tvö ár.

Lögmaður mannsins kveðst undrandi á dómnum og segir skjólstæðing sinn hafa greint nákvæmlega frá ferðum sínum umræddan morgun. Kveðst hann hafa verið á vinnustað sínum þegar eldurinn kom upp.

Maðurinn var giftur konunni, sem var 35 ára, og faðir allra barnanna sem voru á aldrinum tveggja til átta ára.

Lögregla færði manninn til yfirheyrslu eftir að sást til hans í grennd við íbúðina á fimmtudagsmorgninum. Var hann upphaflega ekki grunaður um verknaðinn, en eftir því sem rannsókn hefur miðað áfram hafa grunsemdir aukist um að hann hafi banað fjölskyldu sinni og kveikt í.