Vindmylla brennur í Þykkvabæ

Slökkvilið á Suðurlandi eru nú að störfum við vindmyllu fyrirtækisins BioKraft í Þykkvbæ sem stendur í ljósum logum.

Samkvæmt Brunavörnum Rangárvallasýslu kviknaði eldurinn í mótorhúsi vindmyllunnar í rúmlega 50 metra hæð.  

Brunavarnir Árnessýslu sendu körfubíl á vettvang. Mbl greindi fyrst frá og segir sjónarvottur að eldurinn sé í rénun. Þá hafi hluti fallið úr vindmyllunni.

BioKraft gangsetti tvær vindmyllur í Þykkvabæ í júlí árið 2014. Þær höfðu áður staðið í Þýskalandi.

Aðgerðir standa enn yfir.

Uppfært klukkan 13:25

Leifur Bjarki Björnsson, slökkviliðsstjóri Brunavarna Rangárvallasýslu, gerði ekki ráð fyrir öðru í samtali við Vísi en að eldinum yrði bara leyft að brenna út.

Körfubíllinn frá Árnessýslu sé ekki kominn á staðinn og ekki verði hætt á að senda menn inn í vindmylluna.

Hann segir að mótorhúsið sé að mestu brunnið utan af vélinni og að hann gerði ráð fyrir því að eldinn mætti rekja til olíu vélarinnar.