Jón Daði fær liðsfélaga úr óvæntri átt

Enska Championship-deildarliðið Wolverhampton Wanderers, sem Jón Daði Böðvarsson leikur með, hefur fest kaup á portúgalska miðjumanninum Ruben Neves.

Neves er tvítugur og kemur frá portúgalska úrvalsdeildarliðinu Porto. Úlfarnir eru sagðir hafa borgað 15,8 milljónir punda fyrir Neves, og gerir það hann að dýrasta leikmanni liðsins frá upphafi.

Wolves réðu nýjan knattspyrnustjóra á dögunum, Portúgalan Nuno Santo, en hann var knattspyrnustjóri Porto á síðasta tímabili. Neves er annar leikmaðurinn sem Nunu kaupir yfir til Úlfanna frá Porto, áður hafði hann keypt varnarmanninn Willy Boly.

Árið 2015 varð Neves yngsti leikmaðurinn til að bera fyrirliðabandið í leik í Meistaradeild Evrópu, en hann var fyrirliði Porto í leik gegn Maccabi Tel Aviv. Hann spilaði 17 leiki fyrir Porto á síðasta tímabili og skoraði eitt mark.

Félagaskipti Neves hafa vakið undrun margra í knattspyrnuheiminum og kallar Dean Jones hjá Bleacher report þetta þau félagaskipti sem hafa komið mest á óvart allra í sumar. Hann segir í grein sinni að fyrir nokkrum mánuðum hafi allt litið út fyrir að Chelsea, Arsenal og Liverpool myndu slást um leikmanninn og verðmiðinn gæti orðið allt að 30 milljónir punda.

Jones kryfur félagaskiptin til mergjar í grein sinni þar sem hann minnist á að Neves hafi verið einn efnilegasti leikmaður Portúgals, en frægðarljómi hans hafi dofnað á síðasta tímabili því leikstíllinn sem Porto lagði upp með hafi ekki hentað honum.

Það mun koma í ljós hvort að leikstíll Wolves muni henta Neves betur, spurning hvort Nuno muni koma með sama skipulag til Englands eins og hann lét Porto spila á síðasta tímabili.

Eins og áður sagði þá spilar íslenski framherjinn Jón Daði Böðvarsson með enska liðinu og er hann í miklum metum hjá stuðningsmönnum félagsins. Jón Daði vakti meðal annars mikla lukku hjá einni átta ára stelpu þegar hann sendi henni kort í tilefni afmælis hennar í vikunni. Pabbi stelpunnar þakkaði honum kærlega fyrir á Twitter í vikunni.

What a legend @jondadi is. Sent my daughter a birthday card #wwfcpic.twitter.com/bNC5lo3U1L

— Shaun Pritchard (@primgem) July 5, 2017