Segja uppsagnirnar megi rekja til „óhóflegra útgjalda“ Ólafs

„Óhófleg útgjöld“ formanns Neytendasamtakanna eru meginástæða þess að gripið var til þess ráðs að segja upp öllu starfsfólki samtakanna. Búið er að takmarka aðgang formannsins, Ólaf Arnarsonar, að daglegum rekstri samtakanna og hefur hann til að mynda ekki lengur heimild til að efna til nokkurra útgjalda af hálfu þeirra.

Þetta segir stjórn samtakanna í yfirlýsingu sem birtist á vef þeirra nú fyrir skemmstu.

Þar er einnig rakið að þegar stjórnin hafi gert sér grein fyrir því hver staðan væri hafi hún lýst yfir vantrausti á formanninn og skorað á hann að stíga til hliðar. Þá hafi starfsfólk samtakanna einnig lýst yfir vantrausti á formanninn og biðlað til hans að segja af sér.

„Þrátt fyrir að formanni hafi verið gerð grein fyrir alvarleika málsins, sem hann ber að miklu leyti ábyrgð á, situr hann sem fastast,“ segir í tilkynningunni.

Búið að takmarka aðgang Ólafs

Því hafi stjórninni verið ljóst að grípa þyrfti til aðgerða til að „bjarga samtökunum“ og segir hún að það hafi verið bæði mat hennar og starfsmanna að slíkt yrði ekki gert með Ólaf innanborðs.

Þegar hafi verið gripið til aðgerða sem felist meðal annars í að takmarka aðgang formanns að daglegum rekstri.

„Hann er ekki lengur starfsmaður skrifstofu og hefur ekki heimildir til að skuldbinda samtökin né að efna til nokkurra útgjalda af hálfu þeirra,“ segir stjórnin og bætir við:

„Stjórn og starfsfólk vinnur samhent að því að koma Neytendasamtökunum aftur á réttan kjöl enda er mikilvægi þeirra fyrir þjóðfélagið óumdeilt.“