Lewandowski mjög ósáttur hjá Bayern og gæti endað hjá Chelsea

Robert Lewandowski, framherji Þýskalandsmeistara Bayern München, er mjög ósáttur hjá félaginu þessa stundina sem gæti hjálpað Chelsea við að landa honum í sumar en það leitar að mögulegum staðgengli Diego Costa.

Maik Barthel, umboðsmaður pólska framherjans, segir í viðtali við tímartið Kicker að Lewandowski sé brjálaður út í Carlo Ancelotti og þá sem koma að þýska meistaraliðinu fyrir að hjálpa sér ekki við að verða markakóngur í síðustu leikjum tímabilsins.

Bayern rústaði deildinni en Lewandowski skoraði 30 deildarmörk, einu minna en Pierre-Emerick Aubameyang hjá Dortmund. Þetta er eitthvað sem fer verulega í taugarnar á þeim pólska.

„Robert sagði mér að hann fékk engan stuðning frá þjálfaranum sem lét engan hjálpa honum í síðasta leiknum að verða markakóngur. Ég hef aldrei séð hann svona svekktan,“ segir Maik Barthel í Kicker.

Enskir fjölmiðlar hafa haldið því fram undanfarnar vikur að Lewandowski sé á lista hjá Chelsea en það sér hann sem staðgengil fyrir Diego Costa endi með því að sá spænski yfirgefi Brúnna.