Trump vill takmarka viðskipti við Kúbu

Donald Trump bandaríkjaforseti sagðist í dag vilja takmarka ferðalög Bandaríkjamanna við Kúbu og viðskipti milli Bandaríkjanna og hersins á Kúbu. Reuters greinir frá því að hann vilji afboða „hræðileg og afvegaleidda samning“ Obama, fyrrum Bandaríkjaforseta, við Havana.

Trump hélt ræðu í Miami í Flórídaríki þar sem hann skrifaði undir tilskipun þess efnis að takmarka að einhverju leiti hluta af samningi Obama við Kúbu sem var saminn eftir fundi leiðtoga ríkjanna tveggja árið 2014.

Trump mun þó leyfa einhverjum af breytingum Obama að standa. Bandaríkin munu til dæmis áfram vera með sendiráð í Havana, höfuðborg Kúbu.

„Við munum ekki þegja lengur þegar við stöndum frammi fyrir kúgun kommúnisma,“ sagði Trump á fundinum. „Ég hætti strax við einhliða samning síðustu ríkisstjórnar við Kúbu,“ sagði hann og talaði svo illa um ríkisstjórn Raul Castro, forseta Kúbu.

Trump vill viðhalda langtíma banni á að Bandaríkjamenn fari til Kúbu sem ferðamenn og vill koma í veg fyrir að bandarískir dollarar séu notaðir til að fjármagna her Kúbu.

Fyrr í dag fór Trump á Twitter og staðfesti það að hann væri til rannsóknar vegna brottvikningar James Comey, fyrrverandi forstjóra Bandarísku alríkislögreglunnar, FBI, úr embætti.

„Maðurinn sem sagði mér að reka forstjóra FBI er núna að rannsaka mig fyrir að hafa rekið forstjórann! Nornaveiðar,“ segir Trump í tísti sínu.