Tryllt tölfræði úr enska: Norðmenn skora meira en Brassar og Rodgers er betri en Klopp

Vefsíða breska ríkisútvarpsins, BBC, er með afar skemmtilega tölfræðiúttekt eftir helgina í enska boltanum þar sem kemur meðal annars fram að Norðmenn hafa skorað meira en Brassar í ensku úrvalsdeildinni í gegnum tíðina og að Brendan Rodgers var með betri árangur en Jürgen Klopp eftir 66 leiki hjá Liverpool.

Markið sem Nicolas Otamendi skoraði fyrir Manchester City í 5-0 sigri liðsins á Crystal Palace um helgina var 400. markið sem argentínskur leikmaður skorar í ensku úrvalsdeildinni.

Argentínumenn hafa skorað meira en erkifjendur sínir frá Brasilíu í gegnum tíðina en brasilískir leikmenn eiga að baki 322 mörk í úrvalsdeildinni. Hvorug þjóðin kemst inn á topp fimm listann en þar eru Norðmenn aftur móti í fjórða sæti á undan Nígeríu.

Norskir leikmenn hafa skorað 507 mörk í ensku úrvalsdeildinni en það eru fleiri mörk heldur en leikmenn frá Argentínu, Brasilíu, Ítalíu og Belgíu hafa skorað frá stofnun úrvalsdeildarinnar.

Franskir leikmenn hafa skorað flest mörk erlendra leikmanna í úrvalsdeildinni en þar á eftir koma Hollendingar og svo Spánverjar. Frakkar eru langefstir með ríflega 1.400 mörk en engin önnur þjóð kemst yfir þúsund marka múrinn.

Í þessari úttekt BBC kemur einnig fram að árangur Brendans Rodgers sem knattspyrnustjóri Liverpool í fyrstu 66 leikjunum með liðið var betri en núverandi árangur Jürgens Klopps.

Fyrir leik Liverpool og Southampton um helgina var Klopp með nákvæmlega sama árangur og Rodgers í fyrstu 65 leikjunum; 33 sigra, 18 jafntefli og 14 töp sem gerir 117 stig.

Liverpool gerði markalaust jafntefli við Southampton í gær en Brendan Rodgers vann 66. leikinn sinn sem knattspyrnustjóri Liverpool.