Flynn greindi ekki frá greiðslum frá rússneskum fyrirtækjum

Michael Flynn, fyrrum ráðgjafi Donalds Trump í þjóðaröryggismálum, lét hjá líða að gera grein fyrir greiðslum sem hann fékk frá rússneskri sjónarvarpsstöð og öðru fyrirtæki tengdu Rússlandi í greinargerð um launagreiðslur sínar sem hann undirritaði í febrúar síðastliðnum. Reuters fjallar um þetta.

Í tilkynningu sem barst frá Hvíta húsinu í gær er greint frá því að greiðslurnar komi annars vegar frá rússnesku sjónvarpsstöðinni RT og hins vegar flugfélaginu Volga-Dnepr. Eru bæði fyrirtækin nátengd rússneskum stjórnvöldum.

Greindi Flynn frá greiðslunum í greinargerð sem hann undirritaði á föstudag en þar kemur fram að hann hafi tekið við greiðslunum fyrir að halda ræður í fyrirtækjunum tveimur. Ekki liggur nákvæmlega fyrir hve háar greiðslurnar voru en þær nema að minnsta kosti fimm þúsund dollurum.

Það vakti mikla athygli þegar upp komst að Flynn hefði átt í talsverðum samskiptum við Rússa áður en Trump tók við embætti bandaríkjaforseta. Sagði Flynn af sér í kjölfarið að beiðni Donalds Trump. Hann hafði einungis setið í embætti í 24 daga.  

Á Flynn að hafa gefið varaforsetanum Mike Pence rangar upplýsingar varðandi samskipti sín við sendiherra Rússlands í Bandaríkjunum, Sergey I. Kislyak, skömmu fyrir áramót.