Graham Taylor er látinn

Graham Taylor, fyrrverandi þjálfari enska landsliðsins, er látinn, 72 ára að aldri.

„Það er með mikilli sorg að við þurfum að tilkynna að Graham féll frá snemma í morgun en grunur leikur á hjartaáfalli. Fjölskyldan er í sárum vegna þessa óvænta og sorglega fráfalls,“ segir í tilkynningu frá fjölskyldu Grahams Taylors sem send var á fjölmiðla í Bretlandi í dag.

Taylor spilaði með neðri deildar liðunum Grimbsy og Lincoln á sínum leikmannaferli. Hann þurfti að hætta 28 ára vegna meiðsla og tók þá við Lincoln sem hann gerði að D-deildarmeistara.

Eftir það tók hann við Watford en hann er goðsögn hjá stuðningsmönnum félagsins eftir það sem hann gerði fyrir Watford. Hann kom liðinu úr D-deild og upp í efstu deild á fimm árum eftir að hann tók við því árið 1977. Watford hafnaði í öðru sæti í efstu deild árið 1983 og lék til úrslita í bikarnum árið 1984.

Taylor tók svo við Aston Villa árið 1987 og kom liðinu upp í efstu deild en það hafði fallið úr efstu deild árið áður. Hann skilaði silfri í efstu deild til Villa árið 1990 þegar Liverpool vann sinn síðasta Englandsmeistaratitil.

Sumarið 1990 tók hann við enska landsliðinu eftir HM á Ítalíu og stýrði því í þrjú ár. Hann fór með England á EM í Svíþjóð 1992 en sagði af sér eftir að enska liðinu mistókst að tryggja sér sæti á HM í Bandaríkjunum árið 1994.

Taylor átti eftir að stýra Úlfunum, Watford og Aston Villa aftur áður en hann hætti í þjálfun en hann gerðist stjórnarformaður Watford árið 2009 og starfaði þar í þrjú ár. Hann var síðar gerður að heiðursforseta Watford.