Lokuðu snemma til að bjarga ómetanlegum listaverkum

Fjölsóttasta listasafn Ítalíu, Uffizzi-söfnin í Flórens, þurfti að loka 5 tímum á undan áætlun á föstudaginn síðastliðinn vegna hitabylgjunnar sem nú hrellir Evrópubúa.



Safnstjórinn Eike Schmidt útskýrir að vatnsmagnið í ánni Arno, sem drífur áfram loftkælingu safnsins, hafi lækkað svo mikið fyrir helgi að ekki hafi lengur verið hægt að kæla safnið. Því hafi verið brugðið á það ráð að loka klukkan 13:30 en safnið lokar alla jafna klukkan hálf 7.

Gert er ráð fyrir því að helmingur allra héraða Ítalíu muni lýsa yfir neyðarástandi vegna hitabylgjunnar, sem fengið hefur nafnið Lúsífer, og þurrka sem henni hafa fylgt. Hitinn á Ítalíu hefur víða verið um og yfir 40 gráður um helgina, þar með talið í Flórens á föstudaginn þegar ákveðið var að loka hinu sögufræga safni.

Söfnin greindu frá lokuninni á Twitter-síðu sinni.

#Uffizi #oggi chiusi per guasto all'impianto di condizionamento. Ci scusiamo per il disagio. #Domani #5agosto saremo regolarmente aperti! pic.twitter.com/SvsZI1ahfP

— Gallerie Uffizi (@UffiziGalleries) August 4, 2017

Sjá einnig: Íbúar í Evrópu búa sig undir mesta hita í um áratug

Meðal listmuna á safninu er Fæðing Venusar eftir Sandro Botticelli, Davíðsstytta eftir Michelangelo, sjálfsmyndir Rembrandts, Venus frá Urbínó eftir Tisian og Madonna með langa hálsinn eftir Parmigiano.

Hiti og raki geta skemmt málverk. Kjörhitastigið fyrir varðveislu málverka er um 21 gráða og rakinn má ekki fara mikið yfir 55 prósent. Talið er að ef hitinn hækkar um einungis 4 gráður geti það stytt líftíma málverka um næstum helming.

Safnstjórinn vill fullvissa fólk um að þrátt fyrir hitann á föstudaginn séu málverkin í toppstandi. Með því að loka snemma hafi verið hægt að létta álagið á loftræstingunni og bjarga listaverkunum.