Arboga-morðið í Svíþjóð: Réðst á foreldra sína vegna ósættis um peninga

Dómstóll í Svíþjóð dæmdi í dag 42 ára konu, Johanna Möller, seka um morð og tilraun til morðs á árunum 2015 og 2016. Málið hefur gengið undir nafn Arboga-málið í sænskum fjölmiðlum og hefur það verið eitt mest um fjallaða sakamálið í Svíþjóð á síðustu árum.

Fyrrverandi kærasti Möller, Mohammad Rajabi, sem hafði viðurkennt aðild sína að morðinu og morðtilrauninni á foreldrum Möller, var einnig fundinn sekur. Konan neitaði sök.

Í frétt SVT segir að konan og maðurinn muni nú gangast undir geðrannsókn áður en refsing er ákveðin.

Ráðist á foreldrana með hníf í sumarbústaðnum

Möller er dæmd fyrir morðið á föður sínum og tilraun til að myrða móður sína þann 3. ágúst á síðasta ári í sumarbústað skammt frá Arboga, um hundrað kílómetrum vestur af Stokkhólmi. Ráðist var á foreldrana með hníf í sumarbústað fjölskyldunnar, og lést faðirinn af völdum sára sinna. Móðirin særðist alvarlega.

Rajabi, sem er á þrítugsaldri, hefur viðurkennt þátt sinn í árásinni og segir Möller hafa gefið honum hnífinn sem notaður var. Við réttarhöld kom fram að afbrýðisemi og ósætti um peninga hafi leitt til árásarinnar.

 Átti þátt í dauða kærasta síns

Konan er einnig talin hafa átt þátt í dauða annars kærasta síns en sá fannst látinn í grunnu vatni við sumarbústaðinn árið 2015.

Konan var sömuleiðis fundin sek um stórfelld svik, skjalafals, tilraunir til að múta opinberum starfsmönnum, brot gegn valdstjórn og morðhótanir. Konan neitaði öllum ákæruliðum.