Ekki orðinn brjálaður yfir að vera ekki búinn að skora

„Við erum í mjög góðum málum. Byrjunin hefur verið vonum framar og við höfum komið mörgum á óvart,“ sagði Jóhann Berg Guðmundsson, leikmaður Burnley, þegar Fréttablaðið sló á þráðinn til hans í vikunni.

Það er allt í lukkunnar velstandi hjá Jóhanni Berg og Burnley. Hann er fastamaður í liðinu og hefur spilað virkilega vel síðustu vikur. Staða Burnley er líka lygilega góð. Fyrir síðasta leikinn í fyrri umferð ensku úrvalsdeildarinnar situr Burnley í 6. sæti ensku úrvalsdeildarinnar með 32 stig, aðeins tveimur stigum frá Meistaradeildarsæti.

„Fyrsta markmiðið var að halda sér í deildinni og allt eftir það væri plús. Við höfum ekki talað mikið um hvar við viljum enda í deildinni. Við erum ekki að stressa okkur á neinu þótt við höfum byrjað vel,“ sagði Jóhann Berg aðspurður um markmið Burnley fyrir tímabilið.

Burnley tryggði sér sæti í ensku úrvalsdeildinni vorið 2016 og hélt sér örugglega uppi í fyrra. Lykillinn að því var frábær árangur á heimavelli en Burnley fékk 33 af 40 stigum sínum á Turf Moor.

Engin vandræði á öðru tímabili

„Það hafa margir talað um þetta annað tímabil, að það sé erfiðara en það fyrsta. En sú hefur ekki verið raunin hjá okkur, allavega eins og er. Við erum komnir með meiri reynslu og vitum meira hvernig deildin virkar,“ sagði Jóhann Berg.

Íslenski landsliðsmaðurinn hefur byrjað og klárað síðustu níu deildarleiki Burnley.

„Þjálfarinn hefur sýnt mér mikið traust og ég hef spilað vel. Maður vill spila alla leiki og helst klára 90 mínúturnar,“ sagði Jóhann Berg sem hefur gefið fimm stoðsendingar í ensku úrvalsdeildinni í vetur, flestar í liði Burnley. Hann á hins vegar enn eftir að skora á tímabilinu.

„Ég er búinn að leggja upp fimm mörk og hjálpa liðinu að ná í stig. Þannig ég verð ekki orðinn brjálaður yfir að vera ekki búinn að skora,“ sagði Jóhann Berg sem er einn þeirra leikmanna í ensku úrvalsdeildinni sem hafa skotið oftast í marksúlurnar.

Lykillinn að góðum árangri Burnley á tímabilinu er vel skipulagður og sterkur varnarleikur. Ekkert lið hefur fengið á sig færri mörk (12) í ensku úrvalsdeildinni og Burnley hefur haldið níu sinnum hreinu í 18 deildarleikjum. Það er líka eins gott að vörnin sé sterk því Burnley hefur aðeins skorað 16 mörk, eða minna en mark að meðaltali í leik.

„Við höfum spilað gríðarlega sterkan varnarleik og halað inn mörg stig á þessari aðferð. Auðvitað viljum við skora fleiri mörk en meðan við vinnum leiki 1-0 kvörtum við ekki,“ sagði Jóhann Berg sem þarf, líkt og í íslenska landsliðinu, að sinna mikilli varnarvinnu í leikjum Burnley.

„Það eru margir leikir þar sem við þurfum að sætta okkur við að vera lítið með boltann. Þá er þetta bara spurning hvað þú ætlar að gera þegar þú færð boltann,“ sagði Jóhann Berg sem kveðst hafa byrjað að setja meira púður í varnarleikinn hjá sér þegar Lars Lagerbäck og Heimir Hallgrímsson tóku við íslenska landsliðinu. Þeir hafi ekki gefið neinn afslátt á varnarvinnunni. 

Góður páfi

Tom Heaton, markvörður og fyrirliði Burnley, meiddist í 1-0 sigri á Crystal Palace 10. september. Við stöðu hans tók lítt þekktur markvörður að nafni Nick Pope. Hann hefur slegið í gegn og átt stóran þátt í góðu gengi Burnley. Jóhann Berg kannast vel við Pope en þeir léku saman hjá Charlton og fóru á sama tíma til Burnley.

„Ég þekki hann vel og vissi að hann var mjög góður markvörður. Hann er einn af þeim bestu í að verja boltann sem ég hef spilað með. Ég hafði ekki miklar áhyggjur af honum,“ sagði Jóhann Berg.

Frábærar æfingar

Íslenski landsliðsmaðurinn ber Sean Dyche, hinum rauðbirkna stjóra Burnley með urrandi röddina, vel söguna.

„Hver einn og einasti leikmaður í liðinu veit til hvers er ætlast af honum. Hann fær til sín leikmenn sem vinna og fórna sér fyrir liðið. Æfingarnar hjá honum eru frábærar. Hans sterkasti eiginleiki er að vera með vel skipulagt lið,“ sagði Jóhann Berg um Dyche sem hefur stýrt Burnley síðan 2012.

Að sögn Jóhanns Berg hefur lítið verið rætt um möguleikann á að ná Evrópusæti innan raða Burnley. Hinir rauðvínslituðu lifi bara í núinu.

„Við höfum bara grínast með að vera í Evrópu á næsta ári. Við tökum bara einn leik fyrir í einu. Við erum á frábærum stað í deildinni og viljum vera eins ofarlega og hægt er. Svo sjáum við hvernig taflan lítur út í maí,“ sagði Jóhann Berg að lokum.