Pep: Ég er ekki orðinn verri stjóri þó ég muni ekki vinna titil í ár

Pep Guardiola, knattspyrnustjóri Manchester City í ensku úrvalsdeildinni, mun ganga frá yfirstandandi leiktíð titlalaus en það hefur ekki gerst síðan hann fór út í þjálfun.

Spánverjinn bjó til eitt besta félagslið sögunnar hjá Barcelona og rakaði inn titlum á hverju ári. Hann fór svo til Bayern München og varð Þýskalandsmeistari öll þrjú árin en enginn titill mun koma í hús hjá City í ár.

„Ég er ekki verri stjóri þó ég muni ekki vinna titil. Mér finnst ég vera betri stjóri því ég er búinn að læra svo mikið af þessari reynslu. Ég hef lært að takast betur á við aðstæður en áður,“ segir Guardiola í viðtali við Sky Sports.

„Það eru fullt af frábærum liðum á Spáni sem eru ekki að fara að vinna titil í ár og það sama á við um fleiri deildir í Evrópu. Ég býst við því að eiga langan feril og það mun koma tímabil aftur þar sem ég vinn ekki titil.“

„Ég er ekki að starfa fyrir félag sem hefur unnið marga titla í gegnum söguna eins og Barcelona, Bayern, Inter, Juventus eða AC Milan.“

„Það er þess vegna sem maður er alltaf að læra eitthvað nýtt. Maður verður alltaf að verða betri og betri ef maður ætlar að vinna jafnmikið og United, Chelsea og Liverpool hafa gert í gegnum tíðina. Þetta eru allt félög með ríkari sögu en Manchester City.“

„Þetta er ástæðan fyrir því að ég kom til City. Þetta er mikil reynsla fyrir mig og kennir mér margt. Nú þarf ég bara að taka réttar ákvarðanir fyrir næstu leiktíð,“ segir Pep Guardiola.

Manchester City tekur á móti Manchester United í stórleik í ensku úrvalsdeildinni í kvöld en útsending hefst klukkan 18.50 á Stöð 2 Sport 2 HD.