Leit að Artur lokið í dag: Ekki gert ráð fyrir leit á morgun

Um áttatíu manns úr björgunarsveitum Slysavarnafélagsins Landsbjargar tóku í dag þátt í leit að hinum 26 ára Artur Jarmoszko sem saknað hefur verið frá síðustu mánaðamótum. Leitinni lauk án árangurs á sjötta tímanum í dag og ekki er gert ráð fyrir því að leitað verði á morgun, nema eitthvað nýtt komi fram í málinu.

„Leitin sjálf hefur gengið mjög vel í dag en ekki borið neinn árangur,“ segir Þorsteinn G. Gunnarsson, upplýsingafulltrúi Landsbjargar. „Það hafa engar nýjar vísbendingar borist.“

Í dag var leitað meðfram strandlengjunni frá Gróttu að Nauthólsvík, við Kópavogshöfn og á Álftanesi. Meðal annars var notast við báta, dróna og hunda.

Arturs hefur verið saknað frá síðustu mánaðamótum en vitað er að hann fór í bíó í Laugarásbíó kvöldið sem hann týndist, síðan niður í miðbæ Reykjavíkur þar sem hann sést á öryggismyndavélum taka út fé úr hraðbanka og að lokum tengist sími hans netinu í Kópavogi síðla kvölds. Síðan hefur ekkert til hans spurst.

Málið er rannsakað sem mannshvarf. Nánast útilokað er talið að Artur Jarmoszko hafi farið af landi brott með hefðbundnum leiðum.