Harvard dregur fótboltalið skólans úr keppni vegna kynferðislegra ummæla leikmanna

Harvard-háskóli hefur dregið karlalið skólans úr keppni vegna kynferðislegra ummæla leikmanna í garð meðlima kvennaliðsins. Stúdentablað háskólans upplýsti um skjal leikmanna sem innihélt stigagöf um útlit kvenkyns leikmannanna ásamt kynferðislegum ummælum sem beint var að þeim. Forseti háskólans hefur fordæmt hegðun karlaliðsins. Fjallað er um málið á vef BBC.

Liðið sem er nú í fyrsta sæti háskóladeildarinnar í Bandaríkjunum þarf að gefa alla sína leiki sem eftir eru af tímabilinu. Talið er að skjöl sem innihalda myndir af  leikmönnum kvennaliðsins sé árleg hefð leikmanna, þar sem karlarnir gefa konunum einkunn frá einum upp í tíu eftir eigin hentugleika ásamt ástæðum fyrir stigagjöf. Í skjalinu sést einnig hvaða kynlífsstellingar þeir töldu að hver kona myndi kjósa.

Drew Faust, forseti háskólans, hefur gefið út tilkynningu þar sem hann segir að ákvörðun skólanefndar um að hætta við leiktímabil karlaliðsins sé útspil sem hafi verið nauðsynlegt til að gera leikmönnum og nemendum skólans ljóst að slík hegðun sé óásættanleg og eigi ekki heima innan Harvard-háskóla.

Mikil nauðgunarmenning hefur verið við lýði í háskólasamfélögum Bandaríkjanna og sést það oft strax í byrjun skólaárs, til dæmis með hvatningarborðum með ummælum á borð við „Rowdy and fun. Hope your baby girl is ready for a good time“. Rannsóknir sýna fram á að nemendur sem eru í bræðrafélagi séu þrisvar sinnum líklegri til að nauðga heldur en aðrir nemendur. Auk þess eru konur í systrafélagi 74 prósent líklegri til að verða fyrir kynferðislegri áreitni.

Eitt nýjasta málið tengt nauðgunarmenningu háskólasamfélagsins snýr að sundkappa í Stanford-háskóla sem var kærður fyrir að nauðga meðvitundarlausum kvenkyns samnemanda sínum en hann hlaut sex mánaða dóm, sem mörgum þótti of væg refsing fyrir slíkan glæp.

Meðlimir í kvennaliðinu sögðu í viðtali að þeim blöskraði þá tilhneigingu að litið væri á líkamslegt útlit kvenna  en ekki hæfileika þeirra og að þær væru orðnar langþreyttar á að þetta sé raunveruleikinn sem konur þurfa að búa við á hverjum degi. 

Þjálfari karlaliðsins sagði í yfirlýsingu til stúdentablaðsins Harvard Crimson að liðið væri svekkt yfir að leiktímabilið þurfti að enda á þennan hátt en að liðið virði ákvörðun skólastjórnar.