Jón Daði: Gríðarleg þreyta eftir EM

Jón Daði Böðvarsson er kominn í appelsínugult eftir að hafa samið við enska B-deildarliðið Wolves.­ Hann gerði þriggja ára samning við þetta sögufræga lið en Úlfarnir, eins og liðið hefur verið kallað um árabil á Íslandi, er eitt af stofnfélögum ensku deildakeppninnar og hefur þar að auki unnið sjö stóra titla, þrjá meistaratitla og bikarinn fjórum sinnum.

„Liðið er gott og það getur alltaf allt gerst í fótbolta,“ sagði Jón Daði en eftir hrun félagsins í upphafi níunda áratugar síðustu aldar hefur það aðeins spilað fjögur tímabil í efstu deild, síðast árið 2012. Eftir það tók við fall alla leið niður í C-deild­ en Wolves fór þó strax aftur upp og hafnaði í fjórtánda sæti ­B-deildarinnar í vor.

Eftir það var nýr þjálfari ráðinn og var þekkt nafn fengið til að taka við starfinu, Ítalinn Walter Zenga sem lengi varði mark Inter Milan og ítalska landsliðsins.

Wolves besti kosturinn

„Þetta er bara tóm hamingja og það ríkir mikil eftirvænting,“ segir Jón Daði en tímabilið í ensku ­B-deildinni hefst nú um helgina er liðið mætir Rotherham á útivelli á laugardag. Jón Daði reiknar með að vera í leikmannahópi liðsins þá. Hann segir að félagaskipti hafi legið í loftinu hjá sér í nokkurn tíma.

„Það var passað upp á að þetta myndi ekki leka út og gekk það mjög vel. Þetta kann því að koma eins og þruma úr heiðskíru lofti en þetta er þó búið að eiga sér nokkuð langan aðdraganda,“ segir Jón Daði.

Fleiri lið komu til greina og var annað B-deildarlið, QPR, nefnt til sögunnar. „Þegar allt kom til alls fannst mér Wolves vera besti kosturinn í stöðunni fyrir mig. Þetta var skref sem ekki var hægt að sleppa,“ segir hann.

„Ég finn fyrir miklu trausti, ekki bara frá þjálfaranum heldur einnig frá klúbbnum líka og það er mjög jákvætt,“ segir Jón Daði en umboðsmaður hans, Magnús Agnar Magnússon, vildi ekki staðfesta fréttir breskra miðla um að Jón Daði hafi kostað Wolves um eina milljón punda. Kaupverðið sé trúnaðarmál.

Á heima í úrvalsdeildinni

Sem fyrr segir mega Úlfarnir muna sinn fífil fegri. Liðið komst upp í ensku úrvalsdeildina árið 2009 og náði að bjarga sér naumlega frá falli fyrstu tvö árin en endaði svo langneðst þriðja árið. Ári síðar féll liðið aftur um deild en þá tók við mikið uppbyggingarstarf hjá félaginu.

„Félagið telur sig eiga heima í ensku úrvalsdeildinni og ætlar sér upp. En síðasta tímabil var ekki upp á marga fiska og ekki eins og menn vildu. Það er því viðbúið að þetta muni allt saman taka tíma, ekki síst í ljósi þess að það er nýr þjálfari, nýir leikmenn og nýtt leikkerfi,“ segir Jón Daði.

„Það tekur allt saman tíma að smella saman og það er spurning hvort við gerum atlögu að úrvalsdeildarsætinu strax á þessu ári eða því næsta. En ég hef mjög góða tilfinningu fyrir því að það muni gerast mjög fljótt.

Svipað og í landsliðinu

Jón Daði segir að hlutverk hans verði svipað hjá Wolves og hann hefur gegnt í íslenska landsliðinu. „Þeir vilja að liðið sé mjög þétt. Að leikmenn hlaupi mikið og vinni vel saman. Mitt hlutverk verður að vera öflugur í sókninni, skora mörk og leggja upp en einnig hjálpa til í vörninni. Mér finnst að það passi mér mjög vel,“ segir Selfyssingurinn öflugi.

Mikil þreyta eftir EM

Jón Daði var lykilmaður í íslenska landsliðinu sem komst í 8-liða úrslit á EM í Frakklandi í sumar og sló meðal annars út England í 16-liða úrslitunum. Hann segir að gott gengi á EM hafi hjálpað mikið til.

„Við sjálfir náðum ekki að átta okkur á því hversu langt við komumst og hversu mikill árangur þetta var. Það tók því sinn tíma að koma sér niður á jörðina aftur, enda líkam­leg og andleg þreyta mikil,“ segir Jón Daði sem kemur til Englands frá þýska B-deildarliðinu Kaiserslautern, þar sem hann spilaði í aðeins hálft ár.

„Það var mikið fylgst með manni á EM en líka í Þýskalandi, þar sem mér gekk vel. Þangað koma margir til að skoða leikmenn,“ segir hann en þó nokkrir leikmenn íslenska landsliðsins hafa skipt um lið eftir gott gengi Íslands á EM.

Fótboltinn er svona stundum

Undanfarnir tólf mánuðir hafa verið afar viðburðaríkir hjá Jóni Daða. Fyrir ári var hann að spila með Viking í norsku úrvalsdeildinni en liðið var þá búið að hafna nokkrum tilboðum Kaiserslautern. Jón Daði fór því að lokum frítt til Þýskalands og byrjaði að spila þar um áramótin. Eftir tímabilið í vor tók svo EM-ævintýrið við og nú nýtt félag í Englandi.

„Þetta er svolítið furðulegt allt saman en fótboltinn er svona. Hlutirnir geta gengið hratt fyrir sig og maður verður að vera tilbúinn fyrir hvað sem er. En það er ekki nokkur spurning að þetta ár er það eftirminnilegasta á mínum fótboltaferli og ég mun aldrei gleyma því. En nú verður fyrst og fremst gott að geta einbeitt sér fyllilega að fótboltanum á nýjan leik.“