Fékk send fordómafull skilaboð í gegnum Snapchat

Börn innflytjenda upplifa sig minna virði í samfélaginu en jafnaldrar þeirra. Þetta segir íslensk kona sem flutti til Íslands frá Filippseyjum fyrir næstum tuttugu árum. Hún hefur sjálf fengið send skilaboð í gegnum samskiptamiðilinn Snapchat sem endurspegla fordóma í garð innflytjenda.

Donna Cruz flutti til Íslands frá Filippseyjum ásamt fjölskyldu sinni þegar hún var fjögurra ára gömul. Hún hefur undanfarna mánuði haldið úti vinsælum Snapchat reikningi þar sem hún er með nokkur þúsund fylgjendur. Eins og gengur fær hún margs konar skilaboð í gegnum snjallsímaforritið, en þegar fylgjendunum fjölgaði fór að bera á skilaboðum þar sem gert er lítið úr henni vegna upprunans.

„Algengustu skilaboðin eru þar sem fólk segir að ég sé asnaleg eða kjánaleg en maður getur hunsað þannig skilaboð. En um leið og þetta kemur út í skilaboð þar sem fólk segir að ég sé ekki nógu góð af því ég er útlendingur, þar er rosalega vont,“ segir Donna.  

„Ég veit um fullt af stelpum sem eru af erlendum upruna og finnst þær ekki vera nógu góðar fyrir íslenskt samfélag. Sem ég tengi rosalega vel við, mér hefur alveg liðið þannig þegar ég var yngri.“

Innflytjendur skíra börn sín íslenskum nöfnum til að sleppa við fordóma

Donna segir það sína reynslu að börn innflytjenda upplifi sig vera minna virði en börn sem fædd eru hér á landi. 

„Fordómar gagnvart útlendingum á Íslandi eru alveg til staðar þó að það sé kannski ekki sjáanlegt. Segjum að það sé önnur stelpa alveg eins og ég, nema hún er alíslensk, sem er alveg jafn hæfileikarík og ég og alveg jafn fyndin. Mér mun samt alltaf finnast að hún hafi eitthvað forskot því hún er alveg íslensk. Ég veit alveg um nokkra foreldra sem hafa verið að skíra börnin sín íslenskum nöfnum svo þau þurfi ekki að upplifa fordóma eins og þeir gerðu kannski þegar þeir voru yngri,“ segir hún.

„Það er enginn útlendingur að fara að vinna Ungfrú Ísland“

Donna tók þátt í Ungfrú Ísland fyrr á árinu og segist hafa fengið fyrir það nokkra gagnrýni. „Af hverju ertu að taka þátt? Þú ert ekkert að fara að vinna, þú ert útlensk. Það er enginn útlendingur að fara að vinna Ungfrú Ísland,“var á meðal þess sem Donna fékk að heyra. 

„Sama hversu lengi ég eða einhver manneskja er búin að búa á Íslandi, ef við lítum ekki íslensk út þá erum við allt í einu ekki íslensk. Það er bara svo leiðinlegt að þetta þurfi að vera svona á Íslandi sem er pínulítið land þar sem fullt af útlendingum búa. Af hverju er þetta ennþá til? Af hverju er þetta ennþá mál?“