Cruyff minnst með óvenjulegum hætti á landsleik í Amsterdam Arena í kvöld

Johan Cruyff heitinn er án efa besti knattspyrnumaður Hollendinga fyrr og síðar og einn af bestu knattspyrnumönnum sögunnar. Hann átti frábæran feril og vann marga glæsilega sigra á sínum ferli þótt að hann hafi aldrei unnið gull með hollenska landsliðinu.

Johan Cruyff lést í gær eftir baráttu við krabbamein en hann var 68 ára gamall. Hollenska knattspyrnusambandið hefur kvatt félög í heimalandinu til að minnast Johan Cruyff á sinn hátt.

Hollenska knattspyrnusambandið mun sjálft nota óvenjulega aðferð til að minnast Johan Cruyff í vináttulandsleik Hollendinga og Frakka á Amsterdam Arena í kvöld.

Johan Cruyff spilaði alltaf í treyju númer fjórtán og munu landsliðsmenn Hollendinga og Frakka minnast þessa frábæra fótboltamanns með því að hætta leik í eina mínútu á fjórtándu mínútu leiksins.

Þetta er örugglega í fyrsta sinn sem slík minningastund fer fram í miðjum alþjóðlegum landsleik.

Samskonar minningarstund var á æfingaleik Feyenoord og Sparta Rotterdam á heimavelli Feyenoord í gær en Johan Cruyff spilaði einmitt sinn síðasta leik með Feyenoord.

Johan Cruyff lék stærsta hluta ferils síns með Ajax og Barcelona en spilaði síðasta árið á ferlinum með Feyenoord eftir að Ajax vildi ekki bjóða honum nýjan samning. Johan Cruyff hjálpaði þá Feyenoord að vinna sinn fyrsta titil í áratug.

Það er almennt búist við því að Amsterdam Arena heiti ekki Amsterdam Arena lengi heldur að leikvangurinn verði endurskírður Johan Cruyff Arena til heiðurs flottast fótboltamanni Ajax fyrr og síðar.