Assad útnefnir nýjan forsætisráðherra Sýrlands

Bashar al-Assad Sýrlandsforseti hefur útnefnt Imad Khamis, ráðherra rafmagnsmála, sem nýjan forsætisráðherra landsins. Hann hefur einnig veitt Khamis umboð til að mynda nýja ríkisstjórn í landinu.

Í frétt SVT segir að Assad muni greina frá nöfnum fimm nýrra ráðherra á næstu dögum.

Khamis er menntaður verkfræðingur og mun taka við embætti forsætisráðherra af Wael al-Halqi sem hefur gegnt embættinu frá árinu 2012.

Þingkosningar fóru fram í Sýrlandi fyrir um tveimur mánuðum þar sem flokkur Assads og samstarfsflokkar hans náðu meirihluta, en framkvæmd kosninganna var harðlega gagnrýnd á alþjóðavettvangi.

Khamis hefur átt sæti í ríkisstjórn frá árinu 2011, en ári síðar var hann settur á svartan lista ESB þar sem hann var ásamt öðrum sakaður um að bera ábyrgð á ofsóknum ríkisstjórnarinnar á hendur almennum borgurum.

Borgarstríðið í Sýrlandi braust út árið 2011 og hafa um 280 þúsund manns týnt lífi síðan.