"Balotelli er ekki jafn klikkaður og ég hélt“

Brasilíski varnarmaðurinn Dante bjóst við því að Mario Balotelli, samherji hans hjá Nice, væri mun klikkaðri en hann er í raun og veru.

Balotelli og Dante komu báðir til Nice í sumar. Liðið hefur komið gríðarlega á óvart á þessu tímabili og situr á toppi frönsku deildarinnar, með þriggja stiga forystu á Monaco og Paris Saint-Germain.

Balotelli hefur í gegnum tíðina verið duglegur að koma sér í fréttirnar fyrir ýmis misgáfuleg uppátæki utan vallar. Í vetur hefur hann hins vegar aðallega vakið athygli fyrir góða frammistöðu inni á vellinum.

„Ég hélt hann væri miklu klikkaðri en hann er!“ sagði Dante um Balotelli sem hefur skorað sex mörk í sex deildarleikjum á tímabilinu.

„Hann grínast en ekki það mikið. Hann er ekki egóisti. Hann er mjög áhugasamur um framgang liðsins,“ bætti Dante við.

Brasilíumaðurinn hefur mikið álit á Balotelli sem tók út leikbann þegar Nice bar sigurorð af Saint-Étienne í gær.

„Hann er toppleikmaður. Hann hefur allt. Hann hrífur mig þegar hann er einbeittur og lætur dómara og varnarmenn sem reyna að æsa hann upp ekki trufla sig,“ sagði Dante.