Trúður herjaði á þroskahamlaða í Mosfellsbæ: „Mjög mikill hrottaskapur“

Manneskja í trúðabúningi reyndi að hrella íbúa á Skálatúnsheimilinu í Mosfellsbæ í gærkvöldi. Skálatún er sambýli fyrir einstaklinga með þroskahömlun og segir forstöðumaður þar að þetta athæfi sé algjör hrottaskapur í garð þeirra einstaklinga sem þar búa sem gætu orðið fyrir miklu andlegu áfalli við hrekk á borð við þennan.

Einn af starfsmönnum heimilisins var að undirbúa einn íbúann fyrir nóttina þegar bankað var á glugga herbergisins. Þegar gardínurnar voru dregnar frá glugganum blasti við starfsmanninum manneskja í trúðagervi sem hljóp svo í burtu.

Hefði sjálf tekið trylling

„Starfsmanninum var mjög brugðið og fannst þetta afar óþægilegt,“ segir Sif Maríudóttir, forstöðumaður eins af heimilinu í Skálatúni, en hún segir engu að síður mikið mildi að enginn af íbúunum sá trúðinn.

„Ég hefði sjálf tekið trylling því þetta er eitthvað sem hræðir mig rosalega. Ég hefði ekki þorað að keyra heim af hræðslu. Íbúarnir hjá okkur eru sumir hverjir með ranghugmyndir og þetta hefði geta ýtt þeim langt niður,“ segir Sif.

Skaðinn hefði getað orðið mikill

Skaðinn hefði því getað orðið mikill og segir hún brýnt að minna fólk á að í Skálatúni býr fólk sem er afar viðkvæmt andlega.

„Það vita mjög margir að þetta sé sambýli og mér finnst þetta mjög mikill hrottaskapur og kvikindisskapur að banka svona á gluggann hjá þeim,“ segir Sif.

Sami hrekkur og í Grafarvogi

Um liðna helgi barst lögreglunni á höfuðborgarsvæðinu tilkynning um manneskjur í trúðagervi sem gerðu íbúum Grafarvogs bilt við.

Hafa hrekkirnir verið með svipuðu sniði í Grafarvogi og í Skálatúni í Mosfellsbæ, bankað er á glugga og beðið eftir því að húsráðendur athugi málið. Þegar litið er út um glugga blasir við húsráðendum trúðsandlit. Þá hafa einnig borist fregnir af því að manneskjur með trúðsgrímur hafi elt börn í hverfinu.

Lögreglan á höfuðborgarsvæðinu hefur þennan trúðafaraldur til rannsóknar en Valgarður Valgarðsson, aðalvarðstjóri á lögreglustöðinni á Vínlandsleið, hefur það á sinni könnu.

Grunurinn beinist enn að ungum piltum

Í Grafarvogi lá strax fyrir sá grunur að um væri að ræða pilta í efstu bekkjum grunnskóla sem væru að gera sér þetta að leik. Valgarður segir lögregluna vinna eftir þeim upplýsingum sem hún hefur hverju sinni og því sé enn gengið út frá því að þetta séu piltar á þessum aldri.

„Við vinnum úr þeim upplýsingum sem við fáum inn á borð til okkar. Að þetta séu ungir piltar á ferð sem eru að gera sér að leik að banka hjá fólki og atast í því.“

Fjallað var fyrst um trúðafaraldurinn á vef Vísis í gær en þar var rakið hvert upphaf þessa æðis er, en forvitnir geta fræðst um það betur með því að smella hér.

Í stuttu máli hefur trúðafaraldur farið yfir heiminn á síðustu þremur mánuðum með miklum öfgum, og virðist hann vera að skjóta rótum hér á landi.