Munu ekki tjá sig um niðurrif Exeter-hússins næstu daga

Forsvarsmenn Mannverk ehf. munu ekki tjá sig við fjölmiðla að svo stöddu um niðurrif friðaðs húss við Tryggvagötu 12 í síðustu viku. Von er á yfirlýsingu vegna málsins síðar í vikunni.

Húsið sem stóð við Tryggvagötu 12, og stundum hefur verið kallað Exeter-húsið, var byggt árið 1904. Það var friðað en samkvæmt byggingarleyfi frá 16. mars síðastliðnum má rífa hluta hússins til undirbúnings endurbóta á því og húsinu á lóðinni við hliðina, Tryggvagötu 14.

Mannverk hefur annast framkvæmdina á þessum reit en í liðinni viku reif vinnuvél fyrirtækisins húsið niður á skömmum tíma. Byggingarfulltrúi borgarinnar segir fyrirtækið hafa farið langt út fyrir gildandi leyfi og hefur kært niðurrifið til lögreglu.

„Þeir segjast hafa talið að þeir væru í fullum rétti að rífa húsið,“ sagði Nikulás Úlfar Másson, byggingarfulltrúi borgarinnar, um helgina.  „Það væri ekkert hægt að eiga við þetta hús.“

Ekki hefur náðst í forsvarsmenn Mannverks undanfarna daga vegna málsins en þær upplýsingar fengust í dag að unnið væri að yfirlýsingu eða tilkynningu vegna málsins, sem birt verði á næstu dögum.

Samkvæmt hegningarlögum getur niðurrif friðaðra húsa varðað allt að þriggja ára fangelsi eða sektum ef málsbætur eru.