Özil: Við getum unnið Liverpool

Liverpool og Arsenal eigast við í stórleik ensku úrvalsdeildarinnar í kvöld klukkan 20.00 á Anfield, en leikurinn verður í beinni útsendingu á Stöð 2 Sport 2 HD.

Lærisveinar Arsene Wengers eru á toppi deildarinnar með 42 stig eftir 20 umferðir og eru tveimur stigum á undan Leicester.

Arsenal er nú þegar búið að vinna Manchester United og Manchester City á þessari leiktíð og Mesut Özil hefur tröllatrú á sigri í kvöld.

„Það gefur okkur sjálfstraust að vinna svona sannfærandi sigra á stærstu liðunum,“ segir Özil.

„Við erum á góðri leið á þessari lektíð. Sjálfstraustið er til staðar og við getum svo sannarlega afrekað stóra hluti í ár. Við vitum það og liðið spilar þannig úti á vellinum.“

„Við vitum að við getum unnið Liverpool og við vitum líka að það mun gefa allt sitt á móti okkur. Jürgen Klopp mun undirbúa þá fullkomlega. Við ætlum okkur samt stigin þrjú,“ segir Mesut Özil.