Platini á að hafa grætt bróður Blatter

Sepp Blatter, forseti FIFA, segist hafa fengið hótanir frá Michel Platini, forseta UEFA, fyrir forsetakjör FIFA í maí síðastliðnum.

Blatter segir að Platini hafi komið þeim skilaboðum áleiðis að Blatter færi í fangelsi ef hann hætti ekki við framboð sitt í maí. Hann kom skilaboðunum áleiðis í gegnum bróður Blatter.

Eins og við mátti búast þá hefur Platini hafnað þessum ásökunum sem hann kallar glórulausar.

Blatter segist hafa komið að áttræðum bróður sínum grátandi á FIFA-þinginu.

„Þetta átti sér stað í hádegismat. Platini settist við hlið bróður míns og sagði að ég ætti að hætta við framboðið eða ég myndi enda í fangelsi," sagði Blatter.

Það eru mikil átök á milli Platini og FIFA því eins og við greindum frá fyrr í dag þá hefur UEFA kvartað við FIFA vegna neikvæðs skjals um Platini sem sagt er hafa komið frá höfuðstöðvum FIFA.