Ákærð fyrir póker og peningaþvætti

Ríkissaksóknari hefur höfðað sakamál á hendur þremur einstaklingum fyrir brot gegn almennum hegningarlögum með því að hafa á tímabilinu frá júní 2010 fram til 11. desember 2012, í félagi rekið fjárhættuspil í atvinnuskyni og sér til ávinnings, að því er fram kemur í ákæru sem gefin er út af embætti ríkissaksóknara.

Í ákærunni er þríeykið sagt hafa komið öðrum til þátttöku í fjárhættuspili í húsnæði í Skeifunni sem áhugamannafélagið Poker and play hafði á leigu en einstaklingarnir voru í forsvari fyrir félagið en fjárhættuspil á borð við „black jack“, rúllettu og póker eru nefnd af ríkissaksóknara. 

Þremenningarnir eru einnig ákærðir fyrir peningaþvætti með því að hafa tekið við, nýtt eða aflað sér ávinnings, samtals að fjárhæð um 171 milljón króna, með því að reka fjárhættuspil í atvinnuskyni og sér til ávinnings og komið öðrum til þátttöku í þeim. Fjármunirnir eru sagðir hafa verið greiddir með greiðslukortum af þeim sem tóku þátt í fjárhættuspilum í húsnæðinu í Skeifunni og fóru í gegnum kortaskanna áhugamannafélagsins sem ákærðu voru í forsvari fyrir og inn á reikninga félagsins.

Í ákærunni kemur fram að af þeirri heildarfjárhæð sem á að hafa verið afrakstur peningaþvættisins nýttu tveir af þremenningunum í eigin þágu að lágmarki rúmar 36 milljónir króna en sá þriðji að lágmarki tæpar fimm milljónir króna.

Þá er einn af þremenningunum ákærður fyrir brot gegn fíkniefnalögum með því að hafa haft 0,69 grömm af kókaíni í vörslum sínum sem hann afhenti lögreglu við húsleit í desember árið 2012.

Þá krefst ríkissaksóknari að ákærðu sæti upptöku á fimm spilaborðum ásamt fylgihlutum, spilapeningum og spilastokkum, peningaseðlum samtals að fjárhæð rúmum 550 þúsund krónum, peningaseðlum í erlendri mynt, samtals að fjárhæð 2.975 evrum, innistæðu að fjárhæð rúmri einni milljón króna ásamt áföllnum vöxtum sem voru á reikningi eins ákærða og innistæðu að fjárhæð rúmum 94 þúsund krónum ásamt áföllnum vöxtum sem var á reikningi á nafni áhugamannafélagsins.