Slá þessir í gegn í vetur?

Roberto Firmino - Liverpool

23 ára Brasilíumaður. 181 sm

Kom frá Hoffenheim á 29 milljónir punda



Stuðningsmenn Liverpool bíða mjög spenntir eftir því að sjá þennan sókndjarfa miðjumann á Anfield. Þetta er brasilískur landsliðsmaður sem sló í gegn hjá Hoffenheim í Þýskalandi. Þar var hann í fjögur og hálft ár eftir að hafa spilað með Figueirense í heimalandinu þar á undan.

Hann spilaði sinn fyrsta landsleik fyrir Brasilíu í nóvember á síðasta ári og hefur síðan verið fastamaður í brasilíska hópnum. Hann spilaði með Brössum á Copa America í sumar.

Firmino getur spilað í holunni og einnig á vængnum eða sem framherji. Fjölhæfur og hæfileikaríkur.

Hjá Hoffenheim spilaði hann með fyrrum leikmanni Liverpool, Ryan Babel, en Hollendingurinn ber honum vel söguna. Segir að hann geti hlaupið með boltann, sé með frábær skot og stungusendingar hans séu einnig í hæsta gæðaflokki. Hann ætti að hafa allt til þess að slá í gegn á Anfield í vetur.



Raheem Sterling - Man. City

20 ára Englendingur. 170 sm.

Kom frá Liverpool á 49 milljónir punda

Fór úr því að vera dýrkaðasti maðurinn í Liverpool í að vera sá hataðasti. Þessi vonarstjarna Rauða hersins fór fram á sölu hjá Liverpool þar sem hann vildi vinna titla. Ummæli sem eru ekki líkleg til vinsælda. Hann fékk sínu fram og Liverpool fékk heldur betur vænan skilding fyrir hann. Að sama skapi missir Liverpool heilmikið í þessum hæfileikaríka fótboltamanni.

Þó svo Sterling sé ungur að árum er pressa á honum enda afar stór fjárfesting fyrir City. Hann hefur farið vel af stað með liðinu og litið vel út á undirbúningstímablinu. Það er eitt og enska úrvalsdeildin er svo annað.

Það verður síðan afar áhugavert er hann snýr aftur á Anfield í vetur. Þar fær hann tæplega hlýjar móttökur.





Memphis Depay - Man. Utd

21 árs Hollendingur. 176 sm.

Kom frá PSV Eindhoven á 25 milljónir punda.

Það er þegar byrjað að líkja hollenska undrabarninu Memphis Depay við Cristiano Ronaldo þó svo hann hafi ekki enn spilað sinn fyrsta alvöru leik fyrir Man. Utd.

Ronaldo kom til Man. Utd ungur að aldri og blómstraði í að verða besti knattspyrnumaður heims. Margir sjá fyrir sér að Memphis geti fetað sömu slóð.

Hæfileikarnir eru svo sannarlega til staðar en það verður pressa á stráknum. Miðað við hans orð er hann alls óhræddur við pressu og ætlar sér stóra hluti.

Hann hefur vaxið með hverju árinu hjá PSV og varð markahæsti leikmaður hollensku deildarinnar á síðustu leiktið. Hann er einnig lykilmaður í hollenska landsliðinu. Memphis mun koma með hraða, ákveðni og hæfileika til að brjóta upp leiki í lið Man. Utd.

Toby Alderweireld - Tottenham

26 ára Belgi. 187 sm.

Kom frá Atletico Madrid á 11,5 milljónir punda.

Sterkur belgískur varnarmaður sem þekkir sig vel í enska boltanum eftir að hafa verið á láni hjá Southampton á síðustu leiktíð. Getur spilað bæði sem miðvörður og bakvörður.

Kemur úr hinum margrómaða knattspyrnuskóla Ajax og vann þrjá meistaratitla með Ajax áður en hann fór til spænska stórliðsins Atletico Madrid. Hjá Ajax mynduðu hann og Jan Vertonghen saman miðvarðarpar og eru nú sameinaðir á ný hjá Spurs.

Á fyrsta tímabili hjá Atletico varð hann spænskur meistari og komst í úrslitaleik Meistaradeildarinnar. Hann var svo lánaður til Southampton sem átti að geta keypt hann í sumar en Atletico sleit samkomulaginu, seldi til Spurs og sér ekki fyrir endann á því máli.

Hann hefur verið fastamaður í belgíska landsliðinu síðan 2998 og er búinn að spila yfir 40 landsleiki fyrir firnasterkt landslið Belga.