Hópur ræningja nauðgaði eldri nunnu

Átta menn hafa verið handteknir í tengslum við rannsókn á hópnauðgun í Vestur-Bengal-héraði á Indlandi á laugardagsmorgun, að því er fram kemur í umfjöllun BBC. Um tylft manna réðist inn í klaustur og fór um ránshendi. Þá réðust mennirnir á og nauðguðu 74 ára gamalli nunnu á staðnum.

Konan, sem var talsvert slösuð eftir árásina, er sögð í stöðugu ástandi á sjúkrahúsi í Kolkata.

Kennsl voru borin á sex árásarmannanna eftir að í gær voru birtar myndir af þeim úr öryggismyndavél á staðnum, að því er fréttaveita AFP segir. Þá bauð lögregla verðlaun (100.000 rúpíur eða rúmar 200.000 krónur) fyrir upplýsingar um árásarmennina.