Advocaat fær gamlan lærisvein til Sunderland

Enska úrvalsdeildarliðið Sunderland hefur fengið sænska miðjumanninn Ola Toivonen á láni frá Rennes. Lánssamningurinn gildir út tímabilið.

Toivonen þekkir vel til Dick Advocaat, knattspyrnustjóra Sunderland, en hann lék undir hans stjórn hjá PSV Eindhoven í Hollandi.

Toivonen hóf ferilinn hjá Dagerfors í heimalandinu og lék einnig með Örgryte og Malmö áður en hann fór til PSV árið 2009. Toivonen lék með hollenska liðinu í fimm ár áður en hann fór til Rennes í byrjun árs 2014.

Toivonen, sem er 29 ára, hefur leikið 43 landsleiki fyrir Svíþjóð og skorað níu mörk. Eitt þeirra kom í 3-2 sigri Svía á Íslendingum í vináttulandsleik í maí 2012.

Sunderland er í 19. og næstneðsta sæti úrvalsdeildarinnar eftir þrjár umferðir. Svörtu kettirnir hafa tapað tveimur leikjum og gert eitt jafntefli.