Morðið á 148 stúdentum þaulskipulagt

Talið er að morðið á háskólastúdentunum 148 í Kenía hafi verið skipulagt í þaula og að vígamennirnir hafi fylgst grannt með svæðinu í lengri tíma. Árásin er sú mannskæðasta þar í landi frá því að al-Kaída samtökin sprengdu bandaríska sendiráðið árið 1998 í Naíróbí.

Helen Titus, kristinn eftirlifandi, segir liðsmenn hryðjuverkasamtakana hafa farið rakleiðis að fyrirlestrasal í skólanum þar sem hinir kristnu fara með morgunbænir sínar. „Þeir höfðu rannsakað svæðið. Þeir vissu allt,“ sagði hún í samtali við fréttaveituna AP í dag. Titus varð fyrir skoti en er nú á batavegi. Hún segist hafa lifað árásina af með því að láta sem hún væri dáin.

Hryðjuverkasamtökin al-Shabab segjast bera ábyrgð á árásinni. Höfuðstöðvar samtakanna eru í nágrannaríkinu Sómalíu en liðsmenn þeirra hafa reglulega beint spjótum sínum að Kenía.